上環鳳城酒家

童年時的周末日, 一家人偶爾會到「鳳城」晚飯. 當時飯店的位置正是銅鑼灣富豪酒店現址, 位於天橋底下. 這間老牌順德酒家裝修簡樸沒有地氈, 卻舖細細而生意興旺, 憑藉幾道招牌菜一直吸引到捧場客光顧.
隨著該區的舊樓清拆重建, 「鳳城」多年前已搬到北角渣華道營業, 繼後並進軍九龍旺角開設分店. 這兩間舊舖都是原有老板開設持有, 重視的是食物而不是裝潢. 近兩三年, 「鳳城酒家」數目火速增長, 分店遍佈上環, 銅鑼灣, 黃埔, 尖沙咀及油麻地多處地方, 原來是因為舊店的部份伙計連同廚師, 走出來夥拍新光集團的老闆合作而促成. 店舖多了, 品質卻隨著變得參差.
14號下午時份撥電到上環鳳城訂位食晚飯, 因上環對屋企人來說較就腳, 而從網上搜索資料後, 證實其水準比銅鑼灣的較好. 我作為東道主宴請從澳洲回來的細佬及家人食晚飯, 也點叫了幾味馳名必試菜式: 包括全隻烏雞燉翅, 家鄉桂魚卷, 鍋貼大明蝦, 炸子雞半隻, 乳豬拼盤, 生菜包鵪鶉鬆, 蟹肉扒芥菜膽, 金銀蛋菠菜, 大少炒飯及要預訂的甜品西米焗布甸. 當中價錢最昂貴是$840一大窩的燉翅, 「鳳城」一如以往選用黑色烏雞, 翅仔一梳梳的份量十足, 配合濃湯, 味道尚不俗. 家鄉桂魚卷頗具特色, 跟鍋貼大明蝦(類似蝦多士, 如圖所示)都比想像的好味, 大明蝦是開邊的放在炸麵包上, 蝦爽口而多士仔不肥膩, 口感良好. 炸子雞在這裡也有名, 據悉製作方法是真正的油淋炸子雞, 而非一般常見的鋪滿炸蒜蓉的炸雞, 不過是否有鮮雞味倒見仁見智. 蟹肉扒芥菜膽有不少蟹肉鋪設在菜上, 但當然六十多元的價錢未必是新鮮蟹肉了. 生菜包鵪鶉鬆可勾起點滴兒時回憶, 以前細路仔有生菜包玩包野食, 又可用手執著來食會很開心; 大少炒飯父親讚有水準, 最重要炒得不會濕淋淋是基本要求吧, 甜品西米焗布甸專登為太太而叫, 知她一向喜歡吃, 殊不知這趟父親也青睞, 弟弟闊別香港多年, 也說很久沒吃過這甜品呢. 西米焗布甸內蓮蓉份量很少, 但似乎大家都頗喜愛. 最失望是乳豬拼盤, 本以為「鳳城」乳豬拼盤是乳豬拼上生腸海蜇, 怎料上菜時是普通酒樓般拼上叉燒切雞等...而乳豬質素亦水準以下, 看來點菜時是應該了解清楚用料配搭.
「鳳城」其實還有一些地道名菜可嚐試, 譬如上湯粉果, 大良炒鮮奶, 家鄉煎藕餅....不怕肥膩可試大良野雞卷. 它價錢不會特別平, 但平均水準不俗, 要吃老字號的順德菜是值得一試.